Oahpahus- ja kulturministeriija bidjan johtui sámegielaid ealáskahttinprográmma válbmema
Sápmelaččaid sáttagoddi vulggii mannán skábmamánus Anáris fitnat ovdamearkka dihte riikkabeaidálus.
Govva: YLE/ Suvi Kivelä
Jienat ja videot oktavuođas artihkkalii:
Oahpahus- ja kulturministeriija lea bidjamin johtui sámegielaid ealáskahttinprográmma. Viiddis prográmma válbmen vuolgá johtui ealáskahttinbargojoavkku ja bagadallanjoavkku ásahemiin, maidda Sámediggái lea várrejuvvon ovddasteaddjibáikkit.
Sámedikki várreságadoalli Irja Seurujärvi-Kari mielde bargojoavkku ulbmilin lea vuos čielggadit sápmelaččaid gielalaš dili skuvllain ja virggálaš geavahusas olles riikkas ja válbmegoahtit dan vuođul ealáskahttinprográmma sámegielaid ovddideami várás nu, ahte dat fidnejit seamma dási go earáge gielat Suomas.
Seurujärvi-Kari lea duđavaš, ahte stáhta viimmatge váldá ovddasvástádusa sámiid giellaáššiid ovddideamis, maid vuođđun leat sápmelaččaid iešstivrejupmái guoski lágas dorvvastuvvon gielalaš vuoigatvuođat.
Ministeriija mearrádus ealáskahttinprográmma johtui bidjamis lea hui mearkkašahtti ruđalaččat, daningo dat buktá sámediggái dárbbašlaš lasseresurssaid viiddis prošeavtta ollašuhttimii.
Oahpahus- ja kulturministeriija mearrádus lea vástádus álgagii, man Sámediggi evttohii oahpahusminister Henna Virkkusii jahki dassái.
YLE Sápmi/ Ailu Valle