Eanodaga girdingiettis manná bures - Avvil váttisvuođaid siste
Govva: Yle
Eanodaga girdingiettis ellet buriid áiggiid, muhto Avvila gietti boahttevuohta fuolastuhttá, muitala girdingietti hoavda Matti Sorvari.
Eanodaga girdingiettis manná dán áigge bures. Ruovtturiikka girdinmátkkošteaddjiid mearri lea čielgasit lassánan mannan jagis, muitala girdingietti hoavda Matti Sorvari.
Olgoriikka mátkkošteaddjiid mearri dan sadjái lea njiedjan juoba 60 proseanttain, muhto Sorvaris lea dása čilgehus. Vahkkosaš Pariisa-Eanodat chartergirdin sirdojuvvui Gihttelii, mii čilge olgoriikka mátkkošteaddjiid meari geahppáneami.
- Min njuolggogirdin Pariissas sirdášuvai Gihttela girdingieddái, nu ahte áššehasat bohtet dán áigge Gihttela bokte. Duohtavuođas Eanodaga girdingiettis manná bures. Ruovtturiikka girdimiid geavahandássi leamaš juoba 70 proseantta, Sorvari lohká.
Avvila girdingieddi dan sadjái lea stuorra váttisvuođaid siste. Avvila girdingietti boađus leamaš minusa bealde mannan jagi rájes.
- Avvila girdinbáikkit leat geahppánan ja leat leamaš beaivvit, go eat leat girdán ollenge. Lean gal fuolas Avvila girdingietti boahttevuođas, Sorvari mieđiha.
YLE Sápmi / Aletta Lakkala