Filbmaruhtadeaddjit deaivvadit vuosttas geardde Sámi filbmadahkkiiguin
Skábmagovaid jođiheaddji Suvi West lea movttás dán jagi lágideamin ja doaivu ahte buot manná bures.
Govva: YLE Sápmi / Aslak Paltto
Dán jagi ordnejit Skábmagovain vuosttas geardde deaivvademiid sámi filbmadahkkiide ja filbmaruhtadeaddjiide. Skábmagovaid festivála jođiheaddji Suvi West mielas lea dehálaš buktit ruhtadeaddjiid Sápmái vai sii oidnet buoret sámiid dili.
West lohká ahte ruhtadeaddjiid deaivan ii leat váttis, muhto stuorát váttisvuohta lea diehtit mo sin galgá lahkonit ja maid sidjiide gánneha dadjat. Ja jus sámi filbmadahkki vuolgá dáppe guhkin eret Helssegii, de dat šaddá oalle divrrasin.
Ruhtadeaddjiide lea dehálaš maiddái West mielas čájehit makkár kultuvra sámiin lea ja makkár dilis sámit ellet. Dalle filbmaruhtadeaddjit ožžot buoret gova das, gos filmmaid muitalusat bohtet.
Filbmadahkkiide lea buorre maid gullat kritihka jurdagiin ja filmmain. Ruhtadeaddjit dadjet njuolga mii lea buorre ja mii ii, muhto West muittuha ahte, kritihka ii galgga váldit persovnnalaččat.
YLE buvttadeaddji ohcá dovdduid
Okta ruhtadeaddji ovddasteaddjiin lea YLE genrebuvttadeaddji Pentti Väliahdet. Son goittot ii hálit álgit marginaliseret sámi filmma sierra. Son baicce ohcá filmmaid main lea buorre muitalus ja mat guoskkahit geahččiid.
Väliahdet jáhkká ahte sámi filmmat ja filbmadahkkit lassánit boahttevuođas. Dál lea easkka oidnomis álgobárru. Lihkostuvvamat bibmet jáhkku dasa, ahte sámi filmmaide lea jearalmas. Jus okta filbmadahkki lihkostuvvá oažžut filmmas stuorát márkaniidda, de bohtet lasi dahkkit dadjá Pentti Väliahdet.
Skábmagovat ordnejuvvojit dál juo 13. geardde. Dán jagi teman leat nepalalaš filmmat.
YLE Sápmi / Susanna Guttorm