Giellagádjumii eai gávdno bargit, vaikko ruhta gal gávdno
sámegielat oahppogirjjiid buvttadeapmai leat gal ruđat, muh olbmot geain livččii gielladáidu ja mahttu bargat anaraš- ja nuortalašgielat girjjiid, eai leat beare dohppet bargui.
Govva: YLE
Sámedikki oahppomateriálaid buvttadeapmi dán jahkái mearriduvvui ovdditbeaivve ja oahppomateriáladoaimmahat lea ožžon dán jahkái 290 000 euro buvttademiid váras. Anáraš- ja nuortalašgielat materiálaide lea ruhta, muhto bargit váilot.
Diibmá ruhtamearri lassánii 80 000 euroin ja lea seamma dál dán jagige. Muhto ovdal dan jagiid 1999 -2009 ruhtamearri lei ollesáigge seamma, 210 000 euro. Oahppomateriála čálli Hannu Kangasniemi muitala ahte davvisámegielas ráhkaduvvo dán jagi badjelaš nuppelohkái girjji vuolleskuvlla luohkáin gitta logahahkii.
Anárašgielas joatkašuvvá áppesbargu, birasoahppa lea dál guđát luohká rádjai. vierisgiellabargu logahahkii joatkašuvvá ja jurddan dál lea vierisgiela girjjiid dahkat maid vuolleskuvlii, ruđat leat muhto bargi váilu.
Nuortalašgielas joatkašuvvá áppesbargu ja boarrasut prošeavttat, muhto váttisvuohta lea oažžut bargiid. Sámedikki oahppomateriála čálli Hannu Kangasniemi lohká ahte leat háleštan eiddo, ahte bargiid galggašii fitnet, muhto čeahpes bargiid ii leat dušše dohppet.
Sámegiela ealáskahttinprográmma buktá vuordámušaid
ON eamiálbmogiid erenomaš raporterejeaddji James Anaya cuiggodeapmi deaivá riekta ahte anáraš- ja nuortalašgiella dárbbašit veahki. Deháleamos veahkki dán dilis leat olbmot geat máhttet giela ja bastet bargat oahpposuorggis, dán duođastit Hannu Kangasniemi ja Tiina Sanila-Aikio.
Tiina Sanila-Aikio barggai mannan jagi vel nuortalašgiela oahppomateriálain, muhto geasset ja čakčat bohte dehálut doaimmat. Nuortalašgiela fertii nannet nuoramus mánáide ja dasa áidna goansta lei ásahit giellabeasi maid Čeavetjávrái.
Sanila-Aikio ražai garrasit Saami nuett-searvvi bokte ásahandihte giellabeasi, go Anára gielda ii dan dahkan. Anára gielda máksá ja ordne giellabeasi Avvilii, muhto Čeavetjávrái ii ruhtadeapmi gávdnon.
Anáraškiela Servi stuorra veahkkin
Tiina Sanila-Aikio válddii giellabeasi ásaheami iežas prošeaktan ja mearridii ahte giellabeassi galgá álgit doaibmat. Saami Nuett figgai oažžut ruhtadeami iešguđet ruhtagálduin, muhto lihkostuvai easkka go oaččui veahki Anarašgiela searvvis. Anarašgiela searvvis rávvejedje váldit oktavuođa kulturruhtarádjosii ja doppe ohcat ruđaid. Ruđat luovvanedje ja jo čakčat 2010 nuortalašgielat giellabeassi lea doaibman Čeavetjávrris.
YLE Sápmi / Aslak Paltto ja Veikko Aikio