Indigee-prošeakta movttiidahttá nuorra fitnodatdoalliid
Boazodoalli Áslat Heandarat Lango álggii mielde prošektii vai bastá buorebut ieš jođihit bohccobierggu.
Govva: YLE Sápmi / Aslak Paltto
Jienat ja videot oktavuođas artihkkalii:
Nuorra fitnodatdoallit olles Sámis ja nuortalabbos Ruošša bealde leat čoahkkanan Anárii Siida-museai golmma beaivái. Barents-čállingotti prošeakta Indigee álggahuvvoi mannan čavčča. Ulbmilin lea veahkehit nuoraid oažžut buriid ideaid fitnodaga ceggemii. Prošeakta lea ollen fargga beallemuddui.
Vuosttas konferansa lei skábmamánus Vuoltjeres. Boazodoalli Áslat Heandarat Lango lea vuolgán mielde prošektii ovddidandihte bohccobierggu njuolggovuovdima go Norgga bealde biergojohtu lea oalát bisánan.
- Mun jurddašin indigee-prošeakta fállá stuorra veahki álgoálbmotnuoraide geat áigot ovddidit ieažaset fitnodaga. Jurddašan dan guvlui, ahte mii boazosámit fertet ieža vuovdit dan bohccobierggu ovdal go hoigat visot dan ovddasvástádusa stáhta ala. Ii soaitte leat dat stuorimus beroštupmi stáhtas vuovdit dan bierggu. Danne dovddan, ahte mii fertet ieža dan dahkat, lohká Lango.
Prošeavtta váldočálli Lars Miguel Utsi lea ilolaš go buohkain lea bargomokta ovddidit fitnodatjurdagiid. Utsi dadjá, ahte jos prošeakta lihkostuvvá de nuorain geat eai dán háve leat mielde, lea vejolašvuohta boahtteáiggis álgit maid sullásaš prošektii.
- Jos dát prošeakta lihkostuvvá ja mis bohtet dás leat hui buorit bohtosat, ollugat ovdánit bures ja oasseváldit dovdet iežaset leat lihkostuvvan, de mii nagodit dan čajehit ruhttadeaddjiide ja prošeaktaoamasteaddjiide. De mun gal jáhkan ahte de gal lea oalát vejolaš, ahte oamasteaddjit ja ruhtadeaddjit hálidit vel nuppes lágidit prošeavtta.
YLE Sápmi / Aslak Paltto