Sajos dárbbaša vuovdaleaddji
Sámekulturguovddáš Sajos
Govva: YLE Sápmi
Sámedikki mearreáigásaš prošeaktahoavdda virggi ohcanáigi nohká otne gaskavahku.
Sámediggi lea álggaheamen jagi 2012 loahpa rádjai bisti márkanfievrridanprošeavtta, man ulbmilin lea ovddidit ja láhčit doaibmamálle sámi kulturguovddáža Sajosa fitnodatdoibmii.
Prošeaktahoavda galgá maid ohcat lassibálvalusaid buvttadeaddjiid, hukset ovttasbargofierpmádaga, hutkat sierralágan bálvalusaid maid sáhttá vuovdit oktan bakeahtan ja álggahit maid Sajosa balvalusaid vuovdaleami.
Lappi lihttu lea mieđihan prošektii EAKR-ruhtadandoarjaga. Prošeaktahoavdda báikki ohcciin gáibiduvvo ee. allaskuvladási skuvlejupmi ja máŋggabealát gielladáidu.