Bohccot hihtudit ealgaborro leavvama davás
Govva: YLE Tampere
Bohccot sáhttet hihtudit dahje juoba eastit ealgaborro leavvama davás, čállá Sompio-bláđđi. Dássážii ealgaboaru lea juo leavvan Oulu davábeallai, boazodoalloguovllu máttaoassái.
Professor Arja Kaitala Oulu universitehtas muitala, ahte go ealgaboaru darvána bohccui, dat gahčaha soajáidis, iige sáhte šat sirdašuvvat elgii. Kaitala mielde lea dieđus, ahte ealgaboaru ii sáhte lassánit bohccos, muhto boahttevuođas lea vejolaš, ahte ealgaboaru leavvá davvelabbui jus dálkkádat lieggana ja das šaddá dakkár nálli, mii sáhttá lassánit bohccuin.
Kaitala muitala, ahte dálážis ealgaboaru dagaha bohccuid dušše gaskaboddosaš givssi ja uhca guolgavahágiid.