Ballu eatnamiid manaheamis ILO-soahpamuša ratifiserema dihte lea dušši
Sámiguovllus stáhta oamastusas leat 90 % eatnamiin ja 10 % leat priváhta oamastusas.
Govva: Jarmo Honkanen / YLE
Oassi davvin ássi lappilaččain ballet, ahte sii manahit vuoigatvuođaideaset eatnamiidda jus ILO-soahpamuš ratifiserejuvvo. Sámedikki ovddeš láhkačálli Heikki Hyvärinen muittuha, ahte ballu lea dušši.
Ovdamearkka dihte Peltojärvi Lapinkylä searvvi olbmot leat buktán ovdan sin fuola das, mo eanangeavaheamis mearridit das ovddosguvlui jus ILO-soahpamuš ratifiserejuvvo.
Sámedikki ja Sámi Parlameantta ovddeš láhkačálli Heikki Hyvärinen muittuha, ahte priváhta eatnamat seilot dain, geat daid dálge oamastit muhto ILO-soahpamuša eanangeavahanvuoigatvuođat gusket namalassii stáhta ja Meahciráđđehusa eatnamiid geavaheami ođđasit meroštallama stáhta ja sámiid gaskka.
Sámiguovllus stáhta oamastusas leat 90 % eatnamiin ja 10 % leat priváhta oamastusas. Hyvärinen lohká, ahte dat, mo sápmelaččat ja stáhta sohpet gaskaneaset eatnamiid oktasaš geavaheamis, lea loahpa loahpas politihkalaš gažaldat. Riikkabeaivvit mearridit áššis ja dan várás leat vel máŋggat láhkanuppástusat, maid ferte dahkat.
YLE Sápmi