Ijahis ija bileahtat vuovdimassii
Nils-Heaikka Paltto juoiggadii Ijahis idja -luođi diimmá festiválas.
Govva: YLE / Vesa Toppari
Ijahis idja -festivála bileahtaid leat vuovdigoahtán vuossárgga.
Festivála váldodáhpáhussii, Ijahis idja! -konsertii, lea vejolaš oastit bileahtaid ovddalgihtii Sámi Duoji buvddas Anáris dahje diŋgot Sámi Duojis čujuhusas sami.duodji@co.inet.fi.
Bileahtaid vuvdet ovddalgihtii borgemánu 19. beaivvi rádjai. Bileahtaid hattit leat 15 / 10 €. Bileahtaid fidne maiddái Ijahis idja -festiválas báikki alde, muhto vihtta euro divrasut hattiin, 20 / 15 €.
Ijahis idja ordnejuvvo Anáris 19.-21.8.2011. Váldokonsearttas čuojahit dán jagi earret eará Tuvalaš čottalávluma meašttir Igor Koskendei, ja sámeartisttat Wimme, SomBy ja SlinCraze.
Lasi dieđut Ijahis ijas leat dáhpáhusa neahttasiidduin www.ijahisidja.fi.