Sámi mánáidkulturguovddáža namman "Mánnu"

Sámi mánáidkulturguovddáš bijai johtui vuosttas nammagilvvu čakčamánu 30. beaivvi ja doalai gilvvu gitta golggotmánu álgui. Dan áigge Sámediggái bohte dušše njeallje evttohusa. Daid evttohusain ii gávdnon oktage namma, man livččii sáhttán válljet mánáidkulturguovddáža namman. Evttohus galggai leat oanehis ja deaivilis sámegielat namma, mii govvida sámi mánáidkulturguovddáža doaimma.

Gilvu lei álggus oaivvilduvvon vuollel 18-jahkásaččaide, muhto unnán oassálastima dihte válljenčoahkkin mearridii viddidit gilvvu nuoraide, ja dat dolvojuvvuige Davviriikkalaš sámenuoraid konferensii, mii lei Suoločielggis golggotmánu beallemuttus.

Nuoraidkonfereanssas bohte oktiibuot 18 nammaevttohusa. Buot ledje davvisámegillii čállojuvvon.

Vuoitievttohus lea "Mánnu". Dan lei evttohan 21-jahkásaš sámegiela studeanta Aletta Lakkala. Lakkala lea čilgen iežas evttohusa nu, ahte davvisámegillii sáni stávvaliin leat doaimma ulbmiljoavku; mánát ja nuorat. Mánnu gávdno maid árbevirolaš máidnasiin. Máinnasteapmi lea okta váldofága mánáidkulturdoaimmain.

Nama válljenjovkui gulle Tiina Sanila-Aikio, Inka Nuorgam, Petter Morottaja ja guovddáža doaibmajođiheaddji Petra-Biret Magga-Vars. Válljenčoahkkin meroštalai válljejuvvon nama čuovvovaččat:

- Mánnu-namma lea buorre hutkkus, oaneduvvon mearkkašupmi mánáin ja nuorain. Sátni lea doarvái abstrákta, konkrehta ja dán sáhttá čatnat árbevirolaš oktavuođaide. Mánu sáhttá maid sárgut mánáid geasuheaddjin dieđáhusaide ja doaimmaide. Mánnu čuovgá Sámi mánáide ja nuoraide. Mánu lihkastagaide gusket árbevirolaš barggut ja doaimmat gámasuinniid ja duodjeávdnasiid ávnnasdeamis bohcco njuovvamii. Mánnu-sátni ii seahkan eará prošeavttaid, doaimmaid ja organišasuvnnaid namaiguin. Dat sodjá buot Suoma sámegielaide álkit.

Nammagilvvu vuoiti Aletta Lakkala bálkkašuvvo 200 euro árvosaš skeaŋkagoarttain Sámi Duodji -gávpái.