Eva Biaudet: Ahtisaari soabadallat Sámi eanahálddašeami
Govva: Tiina Jutila / YLE
Ruoŧŧelaš álbmotbellodaga presideantaevttohas ja vehádatáittardeaddji Eva Biaudet hálidivččii čoavdit sámeguovllu eananoamastangažaldaga soabademiin. Biaudet evttoha, ahte presideanta Martti Ahtisaari sáhtášii álgit áššis soabadallin.
Buot oassebealit fertešedje vehá vuollánit vai gávdnošii oktasaš čoavddus, dadjá Eva Biaudet.
- Stáhta lea dieđus áibbaš guovddáš sajis dáin áššiin. daningo stáhta oamasta nu stuorra oasi sámeguovlu eatnamiin.
- Anán jáhkehahttin, ahte Sámi eanariektegažaldagain dárbbašit olggobeale soabadalli ja leange evttohan, ahte dát doaibma heivešii Martti Ahtisaarii. Suopmahan hálida leat ráfigaskaoapmin ja eastadeamen ruossalasvuođaid. Vaikko Sámis ii leatge gažaldat veahkaválddálašvuođain, de lea doppe dattege stuorra váttisvuohta, masa dárbbašuvvošii áinnas dakkár čoavddus, mii dohkke buohkaide, dadjá Eva Biaudet.
YLE