Njuoska bittut beaggá sosiálamedias ja neahtas
Suvi West ja Anne Kirste Aikio Njuoska bittut -prográmma oidnogoahtá Suoma tv:s ođđajagimánus.
Govva: Märät Säpikkäät
Njuoska bittut -prográmmaráidu beaggá sosiálamedias ja neahtas. Prográmma dahkkit Anne Kirste Aikio ja Suvi West leaba šaddan beakkálmasat dan maŋŋá, go prográmma máidnosat ja musihkkavideot jorragohte neahtas.
Erenomáš beroštumi lea ožžon sudno veršuvdna beakkán suopmelaš artista Jenni Vartiainen musihkkavideos.
Prográmmadahkki Anne Kirste Aikio dadjá, ahte ferte leat giitevaš buot fuopmášumis maid leaba oažžon.
- Olmmoš ferte vuollegašvuođain váldit vuostá máhcahaga. Muhto lean maid giitevaš ja ilus, go geahččiid hagahan ii munno prográmma leat mihkkige.
Anne Kirste Aikio dadjá, ahte sudnuide Suvi Westiin leamaš issoras somá, go sudno parodiija sámegielat musihkkavideo beaggigođii nu bures Suoma medias. Lihkku lassin gal vissa dárbbašuvvui earáge.
- Várra dasa vehá čehppodatge dárbbašuvvo, ahte manai ná bures čađa, moddjesta Anne Kirste Aikio ja čilge, ahte video lea bágadallan suopmelaš giehtačálli, bágadalli ja filbmadahkki Oskari Sipola.
- Sámi luondu dieđusge lea fállan midjiide maiddái hui fiinna birrasa.
Njuoska bittut -prográmma guoskkaha sápmelaččaid ja suopmelaččaid doaladumiid nuppiideaset birra. Prográmmaráidu oidnogoahtá YLE TV2:s ođđajagimánu 12. beaivve.
YLE Sápmi