Nuoraidráđđái evttohuvvon bures lahtut
Govva nuoraidráđi čoahkkimis giđđat 2011
Govva: YLE Sápmi
Sámedikki nuoraidráđđi lea ožžon bures evttohusaid lahtuin boahttevaš doaibmabadjái. Sámedikki nuoraidčálli Inka Nuorgam muitala, ahte ođđa lahttoevttohusat bohte binná vuollel logi, muhto dasa lassin dálá nuoraidráđi lahtut leat evttohuvvon joatkit.
Nuoraidráđđi čoahkkanii lávvardaga Anáris gieđahallat lahttoevttohusaid jagiide 2012-2013. Ođđa lahtuid válljemis váldet vuhtii dan, ahte olles Suoma sámeguovlu ja iešguđet giellajoavkkut leat ovddastuvvon ráđis. Nuorgam muitala, ahte evttohasat gávdnojedje miehtá Sámi ja maiddái sámeguovllu olggobealde.
- Evttohusat ođđa lahtuin bohte vuollel logi, muhto oktiibuot dat ledje badjelaš 20. Stuorra oassi min dáláš nuoraidráđi lahtuin hálidit goittot joatkit vel. Min evttohusas leat evttohasat Vuohčus, Anáris, Ohcejogas, Eanodagas ja Oulus.
Čuovvovaš lávki lea evttohasaid dohkkeheapmi sámedikki stivrras. Loahpalaš mearrádus ođđa nuoraidráđis dahkko sámedikki čoahkkimis.
Nuoraidráđđái válljejuvvojit oktiibuot vihtta fásta lahtu ja sidjiide juohke oktii persovnnalaš várrelahtut. Lahtut galget leat 18-25-jahkásaš aktiivvalaš sámenuorat. Dasa lassin válljejuvvojit vihtta fásta áššedovdi, geat galget leat válljema áigge 15-17-jahkásaččat.
YLE Sápmi / Ailu Valle