Sámedikki ságadoalligilvui goit njeallje áirasa
Sámedikki čohkiidančoahkkin dollojuvvo sullii mánotbaji geažes, guovvamánu 15. beaivve Anáris. Dássážii leat aŋkke njealjis almmuhan, ahte sii hálidit Sámedikki ságadoallin. Sámi Radio dieđuid mielde nannosamos evttohasat leat ovddit baji ságadoalli Klemetti Näkkäläjärvi ja čeavetjávrilaš Tiina Sanila-Aikio.
Sámi Radio lea gulaskuddan Sámedikki boahtte baji áirasiid, ahte gean sii vállješedje Sámedikki ságadoallin. Guovtti namma máinnašuvvo dávjjimusat; namalassii mannan baji ságadoalli Klemetti Näkkäläjärvi ja jietnadronnet Tiina Sanila-Aikio.
Speallu jođus
Klemetti Näkkäläjärvi ii mieđit garra spealu, muhto dadjá, ahte ságastallamat leat jođus.
- Galhan dieđusge ságastallamat leat sihke ođđa ja boares Sámedikki áirasiid gaskkas. Ja dat gusket dan, geat galget stivrii ja geat deháleamos lávdegottiide.
Maiddái anárlaš Anu Avaskari ja ohcejohkalaš Anne Nuorgam leaba hipmošeamen ságadoalli báikki. Sudno vejolašvuohta oažžut iežaska duohkái stuorámus joavkku orru goittotge heajut go guovtti eará evttohasa.
Tiina Sanila-Aikio jurddaša su vearjju gilvvus leat dat, go lea varas áirras ja su namma ii leat báidnon.
- Mun in leat leamaš daid mannan baji riidduin mielde, de mun sáhtán objektiivvalaččat ovddidit daid áššiid buohkaiguin.
Mánotbadji áigi vihkkedallat
Sámedikki áirasiin lea velá mánotbadji áigi jorahit goarttaid ja gulaskuddat, gean sii dorjot ságadoallin. Seammás sii sáhttet maiddái guorahallat, gean politihka sii dorjot.
Sámedikki čoahkkin dollo guovvamánu 15. beaivve. Dalle válljejit ságadoalli ja eará luohttámušolbmuid.
YLE Sápmi / Maiju Saijets