Skábmagovaid bileahtat vuvdon bures ovddalgihtii
Skábmagovat 2011
Govva: YLE Sápmi / Aslak Paltto
Skábmagovaid bileahttavuovdin interneahtas nogai gaskavahku. Festiválajođiheaddji Aslak Paltto lohká, ahte eandalit guhkkelabbos boahtti guossit hálidit sihkkarastit čájáhusaide beassama, ja bileahtat leatge dál vuvdon bures ovddalgihtii.
- Mis leat 25 sierra čájáhusa, ja measta juohke čájáhusoassái leat vuovdán 20-30 bileahta. Dat gal muitala juo, ahte dál leat bures vuovdán bileahtaid ovddalgihtii, go dábálaččat eanaš oassi bileahtain vuvdo easkka báikki álde.
- Lea váttis dál vel dadjat, mii čájáhusain geasuha eanemus, muhto mishan lea dál čájáhusbáiki stuorát, go Sajos váldá ođđa báikin 190 čohkkánsaji. Muhto vuordimis lea, ahte go mis lea prográmmas Njuoska bittut tv-ráiddu spesiála, de dan vuovdit gal lohppii, Paltto muitala.
Skábmagovat-filbmafestivála ordnejuvvo ođđajagimánu 26.-29. beivviid Anáris. Bileahtaid festiválii sáhttá oastit dás ovddosguvlui Sámemusea Siidas.
YLE Sápmi / Kaija Länsman & Ailu Valle