Turismmas guovssahasain vurdet ođđa golleruvkke
Govva: Juho Nilivaara
Boahtte áiggi mátkkoštanealáhusa golleruvke ii leat eatnama siste, muhto almmis. Davviguovlluid turismafitnodagat doško gieđaid gaskavahku, go garra beaivvášstoarpmas muitaluvvui viidát máilmmi dieđihangaskaomiin.
Stoarpma boađusin guovssahasat lassánit. Dutkit vurdetge, ahte guovssahasat leat valjis boahttevaš guovtti jagi áigge. Go guovssahasat oidnojit dušše davviguovlluin, gosa lea álki mátkkoštit, dan vurdet leat ođđa golleruvke dálveáiggi turismmas.
Guovssahasat jotket sesoŋŋa
Guovssahasat addet buori vejolašvuođa vanahit sesoŋŋa maid juovlaáiggi olggobeallái. Márkanfievrredanhoavda Markku Oravainen Pohjois-Lapin Matkailu oasussearvvis muitala, ahte mannan vahkus guovssahasaide lei stuorra jearalmas mátkemeassuin Helssegis. Erenomážit Gaska-Eurohpas ja Eŋlánddas leat beroštuvvan dahkat guovssahasmátkkiid.
Nuortariikkain leat juo jagiid golgan turisttat Davvi-Supmii guovssahasaid dihte, muhto eurohpalaččaid beroštupmi lasihivččii čielgasit guovllu turismma. Oravainen jáhkká, ahte guovssahasat geasuhit olbmuid seamma láhkai go Sámi gaskaija beaivváš dahje skábma.
YLE Sápmi / Maiju Saijets