Báŋkobálvalusaid hedjoneapmi čuohcá doaresbeale olbmuide
Báŋkokántuvrraid áššehasat leat geahppánan, go stuorámus oassi olbmuin dikšot áššiideaset dán áigge interneahtas.
Govva: YLE
Báŋkobálvalusat hedjonit Anára gielddas ovddežis. Guovllu guovtti báŋkkus nubbi geahpeda kássabálvalusaid nu, ahte ii fála šat go ovtta beaivvi vahkus, goas báŋkkus sáhttá fitnat loktemin ruđa konttus. Bálvalusaid geahpedeapmi čuohcá erenoamážit doaresbeale olbmuide, geain lea muđuige guhkes mátki báŋkui.
Anárlaš Aune Aikios lea guhtta miilla báŋkui Avvilii. Son dikšu áššiid dábálaččat bearjadagaid, go dalle lea sáhttu ordnejuvvon guhkesmátkkálaččaide. Guovvamánu rájes áššiid dikšun šaddá váddásabbon, daningo báŋkkus ii sáhte šat loktet ruđa earágo ovtta beaivve vahkus.
- Dat lea heittot doaresbeale olbmuide, go kássabálvalusat leat rabas dušše vuossárggaid ja golbma diimmu hávil. Ii leat álki gávdnat sáhtu juste dien beaivve.
Báŋkokántuvrraid kundárat geahppánan
Sámeguovllus dego Anáris, Njuorggámis ja Eanodagas báŋkobálvalusat leat geahppánan garrasit. Ovdal dáin giliin ledje máŋgage báŋkku, muhto dál illá oktage. Báŋkkut leat heaittihan kántuvrraid, go daid doallan lea divrras.
Olbmot eai šat fina kántuvrrain loktemin ruđa. Eanaš olbmot ožžotge báŋkobálvalusaid interneahtas dahje automáhtain, čilge Nordea báŋkohoavda Seppo Kotikangas.
- Kássabálvalusat ja ruđa lokten leat geahppánan 10 prosentii ovddežis. Measta juohkehaččas lea goarta, danin olbmuid ávžžuhit geavahit máksin- ja ruđaloktenautomáhtaid.
Báŋkku molsun áida molssaeaktu?
Aune Aikio ii sáhte dikšut áššiid internehtas, dasgo neahttaoktavuođat Čoađgenjárggas su ruovttus leat heittogat. Ruđa lokten seainnisge lea amas, go lea hárjánan, ahte báŋkkus bálvalit. Dál Aikio smiehtada, mo ášši galggašii čoavdit.
- Áiggun sirdit ruđaid dakkár báŋkui, mii bálvala juohke beaivve. Maŋimuš vejolašvuohta lea dikšugoahtit áššiid dakkár gávppis, mii fállá báŋkobálvalusaid, Aikio árvala.
YLE Sápmi / Maiju Saijets