Eanodahkii ohcagohtet ođđa gielddahoavdda
Eanodaga gildii ohcagohtet lagamus áiggis ođđa gielddahoavdda, go dálá hoavda Pentti Keskitalo báhcá ealáhahkii ja luomuide giđđadálvvi. Ášši bođeš ovdal jo gielddaráđđehusa čuovvovaš čoahkkimis.
Olbmot leat jo smiehttagoahtán, makkár ođđa hoavda galggašii leat.
- Mu mielas livččii buoret, jus gielddahoavda ii livčče dáppe eret. Muhto skihkka goit galgá leat, vai dáppe birge, lohká eanodatlaš Vilho Vanhapiha.
Maiddái Ohcejogas lea fas gielddahoavdda válljen ovddabealde. Dálá gielddahoavda Pentti Keskitalo sávvá, ahte Eanodagas ii geava nu mo Ohcejogas, gos hoavddat eai biso guhká.
- Galhan dan sáhttá eastit nu, ahte bisuhit dákkár áššálaš hálddašankultuvrra, mas virggihálddašeaddjiin leat iežaset rolat ja barggut, ja luohttámušolbmot fas fuolahit iežaset boasttas. Eanodagas eai leat leamaš dáid áššiin váttisvuođaid guhkes áigái, Keskitalo muitala.
Eanodahkii lea ulbmil válljet ođđa hoavdda ovdal geasi. Virgi boahtá ohcanláhkai farggabeliid.
YLE Sápmi / Kaija Länsman