Gauriloff dokumeantta soitet oaidnit miljovnnat olbmot
Nuortalaš Katja Gauriloff dokumeanta "Säilöttyjä unelmia" jorrá dál Suoma filbmateáhteriin. Filbma muitala das, mo okta borramušdoassa johtá máilmmis Supmii. Seammás dokumeanta muitala daid olbmuin, geat oassálastet doassa ráhkadeapmái. Dokumeantta oidnet boahttevuođas joba 250 miljovnna olbmo.
Nuortalaš Katja Gauriloff dagai dokumeantafilmma das, mo okta metállaburke ráhkaduvvo, devdojuvvo ja fievrreduvvo máilmmis Supmii. Dokumeanttas čuovvut nu polskalaš njuovvi go brasilialaš ruvkebargi barggu, jurdagiid ja nieguid.
- Álggus ballen, ahte eará giela ja kultuvrra dihte in gulahala filmma olbmuiguin, muhto buot manai bures, ja bastiimet háleštit nugo olmmoš olbmui, Gauriloff muitala.
Ii buot álkimus fáddá
Bargojoavku čielggadii guokte jagi, guđe guovllus máilmmi ovtta euro árvosaš burkke sierra ávdnasat bohtet. Metálla boahtá Brasilias dahje Austrálias, tomáhtat Espánnjas, muhto gortni álgoriikka sii eai dieđe. Álkimus dokumeantafáddá dát ii lean.
- Lei váttis beassat govvet ruvkkiide ja njuovahagaide. Báikkálaš veahkkebargit rahče dan ovdii, ahte olbmot sáhtte luohttit ja luoitit min govvet. Sii eai ovdamearkka dihte čájet fitnodagaid namaid gostige, lohká Gauriloff.
Filmma oidnet joba 250 miljon olbmo
Ođđa dokumeanta lea dál oaidnimis Suoma filbmateáhteriin. Stuorámus geahččiidloguid ožžot gal easka boahttevuođas, go dokumeantta čájehit ovtta hui dovddus kanálas, rámida buvttadeaddji Joonas Berghäll.
- Dokumeanta oidno Al-Jazeera kanálas. Dan bokte filmma oidnet 120 sierra riikkas ja geahččit sáhttet leat joba 250 miljovnna.
Katja Gauriloff šattai dovddusin jagis 2007 gárvánan dokumeanttastis "Huuto tuuleen". Filbma muitalii nuortalaččaid árggas Čeavetjávrris.
YLE Sápmi / Kaija Länsman