Girku galggašii eambo bargat sámegielat bálvalusaid buorrin
Evaŋgela-luteralaš girku sáhtášii olu eambo bargat sámegielat balvalusaid buorrin nu davvin go máddinge, oaivvilda Sámedikki áidna nu gohčoduvvon olgosápmelaččaid ovddasteaddji Pirita Näkkäläjärvi. Näkkäläjärvi evttoha, ahte girku lasihivččii sámegielat fálaldagaidis sihke sámeguovllus ja dan olggobealde.
Dán rádjai leat sihke Mátta- ja Davvi-Suomas lágiduvvon sámegielat ipmilbálvalusat, mat leat geasuhan olu olbmuid. Dát eai goittot okto reahkká, go olu earáge doaimmaid livččii vejolaš ordnet. Pirita Näkkäläjärvi mielas sámegielat doaimmat leat olgosápmelaččaide hui dehalaččat sin identitehta nammema dihte.
- Dan lassin, ahte girku fuolaha Sámis sámegielat girkofálaldagain, de sáhtášii dan dahkat maiddái Mátta-Suomas stuorámus gávpogiin, gos leat olu sámit. Ipmilbálvalusaid lassin sáhtášii ovdamearkka dihte ordnet sámegielat rihppaskuvllaid ja sámegielat bottuid eallilanolbmuide. Das sáhtášii leat stuorra ávki dasa, ahte sámegiella eallá ja gullo.
Davvin fas nuoraide galggašii muitalit, ahte girkku siste leat ollu vejolašvuođat. Sámenuorat eai goit dán rádjai leat movttiidan lohkat teologiija, vaikko bargu sihkkarit gávdnošii.
- Girku sáhtášii bargat olu eambo maid sámeguovllus. Dat sáhtášii álggahit sámegielat doaimmaid mánáide ja nuoraide, vai maiddái sii oainnášedje, ahte dákkárge doaimmat leat. Dat ii leat imaš, ahte nuorat eai oba smiehtage, ahte teologiija maid sáhtášii studeret ja girkus livčče bargosajit, lohká Näkkäläjärvi.
YLE Sápmi / Veikko Aikio