Guhtta ohcci Ohcejoga gielddahoavdda virgái
Ohcejoga gielddahoavdda virggi leat ohcan guhtta olbmo. Ohcanáigi nogai maŋŋebárgga veaigin.
Ohcejoga gielddahoavdda báikki ohcet restonoma (amk) Marko Hoikkaniemi Haukiputaas, filosofiija magisttar Jaakko Kyllönen Helssegis, filosofiija magisttar Henrik Kunttu Jyväskyläs, filosofiija magisttar Ari Koskinen Kotkas, diploma-inšeneavra Allan Hamari Ranuas ja servodatdiehtagiid magisttar Päivi Salminen Ohcejogas.
Hamari, Hoikkaniemi ja Kunttu ohce virggi maiddái jagis 2010, goas Ohcejoga gielddahoavdan válljejedje servodatdiehtaga magistara Matti Korkala. Korkala celkkii iežas virggis eret, go lei leamaš gielddahoavdan badjelaš jagi.
Ohcejoga gielddaráđđehus čoahkkana guovvamánu 2. beaivve árvvoštallat ohcciid gelbbolašvuođa ja mearridit, mo válljemiin joatkit. Molssaeaktun leat juogo válljet gielddahoavdda njuolga, bovdet ohcciid jearahallamii dahje bidjat virggi ođđasit ohcan láhkai.