Jieŋat leat ain rašit Sámis
Sámis jieŋaid alde lea valljis geahppa buolašmuohta, mii eastá jieŋa assumis.
Govva: Eelis Pulkkinen
Suoma birasguovddáža mielde Sámi čázádagaid jieŋat leat ain báikkuid rašibut go ovddit dálvviin. Ovdamearkka dihte Geavujávrri jiekŋageardi lea dál asehut, go maid birasguovddáš lea goasge mihtidan.
Garra buollašat eai leat assudan jieŋa, danin go čázádagaid alde lea máŋggain sajiin valljis geahppa buolašmuohta, mii eastá jieŋa assumis. Hydrologa Johanna Korhonen mielde buot Lappi mihtidansajiin jieŋaid assodaga eai beasa oba mihtiditge rašes jieŋa dihte.
Korhonen muitala, ahte Gilbbešjávri lea dálá dilis Suoma jávrriin áidna, gos lea jagiáigge gaskamearrái veardidettiin dábáláš jiekŋageardi, measta 60 sentimehtera. Muđui čázádagaid jiekŋageardi lea Lappi davviosiin binná badjelaš 30 sentimehtera ja eará sajiin lagabui 40 sentimehtera, mii mearkkaša 10-15 sentimehtera asehut jieŋa go dábálaččat.
Hydrologa Johanna Korhonena mielde guhkitge buolašáigodat ii assut čázádagaid jiekŋagearddi olus, go muohta lea dan veardde čavgadit dan alde. Lappi čázádagain maiddái čázeoaivvit leat jiekŋuma ja stuorra rávnnjádagaid dihte allin. Ovdamearkka dihte Anárjávrri čázi allodat lea sullii 35 sentte badjelabbos, go dán muttus áiggi gaskamearálaččat.
YLE