Jienastanmokta njiejai Lappis
Govva: YLE / Kalle Niskala
Lappilaččaid jienastanmokta njiejai binná presideanttaválggaid nuppi jienastangearddi ovdajienastusas. Ovddalgihtii jienastedje nuppi jienastusas 39,2 proseantta lappilaččain, go vuosttas jienastusas jienastanproseanta lei 40,1.
Vuosttas jienastusas lappilaččat ledje viššalamosat jienastit ovddalgihtii. Sámi gielddain aktiivvalamos ovdajienasteaddjit ledje Anáris, gos jienastanproseanta lei 40,6. Eanodagas jienastanproseanta lei 35,7, Soađegilis 36,7 ja Ohcejogas 35,0.
Nissonolbmuin ovddalgihtii jienastedje 43,3 proseantta ja almmáiolbmuin 35,1 proseantta.
Virggálaš válgabeaivi lea sotnabeaivve 5. guovvamánu.