Meahciráđđehus rabai sámegielat facebook-siidduid
Govva: Metsähallitus
Meahciráđđehus lea rahpan Sámi álbmotbeaivvi gudnin sámegielat facebook-siidduid. Sámegielat siidduin Meahciráđđehus háliida lasihit sámegielat bálvalusaidis.
Sámi meahcit ja luondu -siidduide čohkkejuvvo Meahciráđđehusa sámegielat dieđihandoaibma. Siidduin leat Meahciráđđehusa sámeguovllu álbmot- ja luonddumehciid, meahcceeanaguovlluid ja Davvi-Sámi vuvddiid áigeguovdilis áššit ja govat.
Dás duohko sámegielat siidduin sáhttá čuovvut buot Meahciráđđehusa almmuhan sámegielat ođđasiid ja dáhpáhusaid.