Ministeriija lasihivččii boazodoalloguovllu gumpelobiid
Gumppe goddin boazu. Gumppet dagahedje boazodollui vahágiid miljon euro ovddas mannan jagi.
Govva: Tuuli Rautava-Lakela
Eana- ja meahccedoalloministeriija evttoha lasi gumpegoddinlobiid boazodoalloguvlui. Ministeriija lea sádden cealkámušaid várás ásahusárvalusas, mainna evttohit boazodoalloguvlui 18 lobi lasi.
Dát mearkkaša dan, ahte Suoma fuođđoguovddáš sáhttá mieđihit boazodoalloguvlui sierralobiid eanemustá 18 gumppe goddimii. Dálá lohpevuogádaga mielde olles riikkas oažžu bivdit 20 gumppe. Dáid lobiin lea šat okta geavatkeahttá.
Fuođđo- ja guolledutkanlágádusa mielde lea dárbu lasihit lobiid, daningo gumppet dagahit mearkkašahtti vahágiid boazodoalloguovllus. Jagis 2011 gumppet dagahedje boazodollui vahágiid sullii miljon euro ovddas.
Dálá bivdoáigodagas leat boazodoalloguovllus goddon 16 gumppe. Fuođđo- ja guolledutkanlágádusa mielde boazodoalloguovllus leat ain 20 - 25 gumppe.
Suomas árvalit gumppiid leat dál eanet go mannan jagi. Fuođđo- ja guolledutkanlágádusa mielde Suomas leat dál 150 - 165 gumppe, go jahki dassái dahkkon rehkenastimiid mielde dat ledje 135 - 145. Jus lohkui rehkenastit guktuid beal Suoma ja Ruošša rájá johtti gumpevalvviid ja -báraid, de gumppet leat 180 - 210.
YLE