Niinistö ii leat nannen Anárii boahtima
Govva: Jukka Lintinen / YLE
Sámedikkis vurdet lagas áiggiin presideanttakansliijas nannejumi das, searvágo Suoma ođđa presideanta Sauli Niinistö sámekulturguovddáš Sajosa ja ođđa Sámedikki rahpanávvudemiide cuoŋománu álggus.
Bovdehus presideanttakansliijai sáddejuvvui juo mannan jagi bealde. Árbevirolaččat presideanttat leat oassálastán rahpanávvudemiide, earret eará Martti Ahtisaari ja Tarja Halonen leaba fitnan rahpandoaluin.
Ođđa presideanta vuostáiváldá virggis boahtte mánu álggus, ja jáhkkimis dan maŋŋá su prográmma nannejuvvo. Sámedikkis ja Sajosis leat buorre doaivagat presideantta oassálastimis, go beaivi leamašan juo guhká dieđus.
- Dathan lea jo mannan jagi addon dat bovdehus, muhto Halonenhan lea ain presideanta, de oaidnitleš goas ođđa presideanta váldá dákkár bovdehusaid vuostái. Muhto mii gal sávvat, ahte son boađášii, muitala Sajosa dáhpáhusordnejeaddji Marja Männistö.
Sámekulturguovddáža ja Sámedikki oktasaš rahpandoalut dollojuvvojit cuoŋománu 3. beaivve.
YLE Sápmi