Ohcejogas eai hálit anárlažžan
Suomas áigot čađahit stuorra gieldaođastusa. Stáhta hálida ovttastahttit earret eará Anára ja Ohcejoga gielddaid, ja Vuohču guovllu oktan gieldan. Ohcejogas eai dohkket evttohusa, ja ballet dan jávkadit sámegielat bálvalusaid.
Sámeáššiid ovddideaddji Kati Eriksen mielas Ohcejohka ii heive oktii Anáriin.
- Ohcejogas leamašan áli dakkár mentalitehtta doalahit sámevuođa ja doalahit giela. Vaikko leamašan garra deaddu válljet suomagiela ja álgit suomastit, de liikká olbmot eai leat vuollánan.
Ohcejohka lea Suomas vel dat áidna gielda, gos sámit leat eanetlogus. Ovttastahttin rievdadivččii dili oalát.
- Giella boahtá gullot almmolaš oktavuođain, ja politihkalaččat ja hálddahuslaččat mealgat uhcit maid dat gullo dál. Mun gal balan, ahte dalle boahtá davvisámegiella jávkat.
Gieldaođastusain ii seasttášii
Ohcejoga sadjásaš gielddahoavda Raimo Hekkanen girddihii gaskan buohcanluomu kommenteret evttohusa. Songe ii dohkket gielddaid ovttastahttima. Stáhta mielas ovttastahttin seastá ruđa, muhto Hekkanen mielas moatti bargi geahpedeapmi ii olu seastte.
- Go mearridanválddi ja gielddaguovddáža dolvot eret, de dathan jo njuolga heajuda olbmuid bálvalusaid. Mearrádusas báitá, ahte dat lea dahkkon Helssegis, eaige das leat gullan doaresbeale olbmuid.
Ohcejogas lasihivčče Deanuleagi ovttasbarggu
Jus leaš bággu ohcat ovttasbarggu ja dainna seastit, de galggašii baicce vilppastit Kárášjoga ja Deanu guvlui, jurddaša Eriksen.
- Deanuleahki lea dakkár obalašguovlu, gos olbmot ovttastallet. Daid olbmuin leat oktasaš giella ja intreassat, dat lea dat guovlu, gos mis galggašii leat ovttasbargu.
YLE Sápmi / Kaija Länsman