Ohcejogas Suomas johtileamos neahttaoktavuohta
Govva: YLE
Ohcejoga gielddas lea dál okta Suoma johtileamos neahttaoktavuođain. Erenoamážit fitnodateaiggádat leat hui duđavaččat, go dál gulahallan ja fitnodaga vuovdaleapmi lea olu álkit go ovdal.
Fitnodatdoalli Petteri Valle orru Deanuleagis Ohcejoga gielddas. Ovdal su fitnodagas lei heajos neahttaoktavuohta, muhto dál son ii dárbbaš go spoahkkalit ja dieđut gurgalit dihtoršerbmii. Valle fitnodat lea okta dain, mii lea laktojuvvon govdaoallái Ohcejogas. Fitnodatdoallái johtilis oktavuohta lea hui dehálaš.
- Mii vuovdit olgoriikkaide iežamet pakeahtaid ja olu gártat govaid sáddet. Dat leat stuorra govat máŋgii, de gal dat lei ovdal hui váttis ja heittot, go ii dáhtton oažžut daid mannat. Dál govat mannet nu jođánit.
Eai vuordán nu olu diŋgojeaddjiid
Čuovgafiberkábela goivo Ohcejohkii mannan geasi. Dán dálvvi dáluide leat bidjan oktavuođa, mii lea okta dain johtilepmosiin Lappis ja Suomasge. Govdaoali ožžo viimmat, go diehtojohtolatfitnodat vuollánii prošeavtta vehkiin fállat oktavuođa. Ledje rehkenastán, ahte dušše 40 dálu váldet govdaoali, muhto Ohcejogas leat dál 250 dingojeaddji.
- Dingojeaddjit leat mángga geardde eanet go maid telefitnodat, prošeakta ja johtolatministeriija ledje vuordán, muitala Laajakaista kyliin -prošeavtta (sá. Govdafierbmi giliide -prošeavtta) bargi Jussi Rantamo.
Eará guovlluide maid gáibidit buoret oktavuođa
Lappis leat buncon heajos oktavuođain eará sajisge go Ohcejogas. Anára Gápmasis neahtta doaibmá velge čuohte geardde njoazibut go Ohcejogas. Fitnodateaiggát Agle Kallas sávvá, ahte Anára gildiige oaččošedje seammaláhkai johtilis oktavuođaid.
- Mun divššun guovtti fitnodaga báberbargguid ja jus neahtta doaimmašii johtileabbot, seasttášin ollu bargoáiggi.
YLE Sápmi / Maiju Saijets