Oulus álgá sámegielat mánáiddoaibma
Mäntylä-Snellman beaiveruovttu Uhca Sápmi -latnja Oulus
Govva: YLE Sápmi / Sámmol Lukkari
Oulus leat álggaheamen astoáiggedoaimma sámemánáide dán vahkuloahpas. Oulu Sámit -searvi ja Valve sátnedáiddaskuvla álggahit ovttas doallat Ánnán dánnan -hoahkanjoavkku.
Ulbmilin lea ovttas oahpahallat sihke árbevirolaš ja ođđa hoahkamiid, stohkosiid, lávlagiid, luđiid, muitalusaid ja máidnasiid. Dákkár sátnedáiddárieggát eai leat leamaš ovddežis. Ordnejeaddjit sávvet, ahte doaibma viiddošii eará gávpogiidda ja maiddái sámeguvlui.
- Mii dieđusge sávvat, ahte jos dát min doaibma vuolgá bures johtui ja olbmot movttiidit ja mánát liikojit, de dát livččii dakkár jurdda, man sáhtášii maiddái doalvut ovddosguvlui eará báikkiide. Dákkár doaimma sáhtášii ordnet kánske eará stuorra gávpogiin, main leat olu sápmelaččat, dahje dieđusge lunddolaččat maid Sámis, muitala Ánte Aikio Oulu Sámit -searvvis.
Hoahkanjoavku deaivvada juohke nuppi lávvardaga diibmu 12.00 Valves, 3. gearddis sátnedáiddaskuvlla lanjain. Vuosttas geardi lea 4.2.2012. Das maŋŋá deaivvadeamit leat 18.2., 3.3., 17.3., 31.3, 14.4. ja 28.4.
YLE Sápmi