Ovttain goarttain guollebivdui
Govva: Juha-Pekka Inkinen
Boahtteáiggis guollebivdui beassá olles Suomas ovttain guollelobiin. Ná evttoha eanan- ja meahccedoalloministeriija ásahan bargojoavku, mii duorastaga almmustahtii ođđa guolástusláhkaevttohusa.
Evttohusas lea guolástusgoartta haddin 35 euro jagis, 10 euro vahkus dahje 5 euro jándoris. Guolástusgoartta galggašedje oastit buot badjel 18-jahkásaš bivdit. Máhtovuokkain oaggun ja dálveoaggun seilot buohkaid friija vuoigatvuohtan.
Ástoáiggibivdiid fiermebivddus eai nuppástusat
Davvin ollu ságastahttán astoáiggeguolásteaddjiid fierbme- ja vuoggabivdui eai evttohan nuppástusaid, dasgo bargojoavku ii beassan bivddu ráddjemis ovttaoaivilii. Oassi bargojoavkku lahtuin hálidedje ráddjet firpmiid ja vuoggabivdosiid meari. Nuppit fas oaivvildedje, ahte áššit gullet báikkálaš guolástusa geavahan- ja dikšunplánaide.
Astoáiggeguolásteaddjiin hálidit gieldit stuorra merddiid, trole ja stuorra nuhtiid geavaheami. Bargojoavku goittotge udnošii astoáiggeguolasteaddjiid geavahit unna gáddenuhtiid. Lassin bargojoavku guorrasii dasa, ahte golmma davimus gielddas friija guolástanvuoigatvuohta bisošii. Friija guolástanvuoigatvuohta guoskkašii goittotge dušše bivdi iežas ássangieldda.
Ođđa guolástusláhka boahtá fápmui áramustá 2014.
YLE Sápmi / Veikko Aikio ja Maiju Saijets