Sámi álbmotbeaivvi ávvudit miehtá Suoma

Sámiid álbmotbeaivvi gudnin Sámi oahpahusguovddážii ja sámemusea Siidii besset buohkat nuvttá oahpásmuvvat.

Sámi mánáidkulturguovddáš Mánnu ordne mánáid álbmotbeaivvi doaluid sihke Anáris ja Heahtás. Anárii čoahkkanit skuvlamánát Avvilis, Anáris, Vuohčus, ja Gáregasnjárggas, ja unnoraččat Ohcejogas ja Anáris. Ulbmil lea fállat mánáide ja nuoraide vejolašvuođa čoahkkanit oktii ja ávvudit Sámi álbmotbeaivvi. Ávvudandoalut leat Sajosis diibmu 12.00-13.30.

Luondduguovddaš Skierris Heahtás álbmotbeaivvi doalut álget diibmu 17.00. Sámi mánáidkulturguovddaš ordne dáhpahusa ovttas Sámisostera Bálddas-prošeavttain. Prográmmas leat Máret Magga bivttasčájahusa rahpan, ja árbevirolaš juoigit Juha Tornensis, Inga-Máret Gaup-Juuso ja Ántte Ovlla Juuso.

Oaivegávpotguovllus álbmotbeaivvi ávvudit eahkes Annantalo auditoriijas, gos čájehit sápmelaš filbmadahkki Paul Anders Simma filmmaid. Giellagas-instituhtta doallá árbevirolaš álbmotbeaisemináras duorastaga guovvamánu 9. beaivve Oulu universitehtas.

Sámediggi dan sadjái ii ordne iežas álbmotbeaidoaluid dán jagi. Hálddahushoavda Juha Guttorm muitala, ahte ođđa Sámedikki rahpandoaluid ordnen lea dolvon olu áiggi. Maiddái álbmotarkiivva rahpandilálašvuođa, mii ordnejuvvo cuoŋománus Sajosis, leat juo plánegoahtán.

Guovvamánu 6. beaivi válljejuvvui sámiid álbmotbeaivin vuosttas sámiid oktasaš čoahkkima mielde. Vuosttas čoahkkin dollojuvvui guovvamánu 6. beaivvi jagis 1917 Troandimis. Čoahkkimii oassálaste sihke davvi- ja máttasámit. Dalle iešguđet guovlluid sápmelaččat vuosttas geardde bargagohte oktasaš áššiiguin.

Álbmotbeaivvi gudnin sámeguovllus levgejit Sámi leavggain.