Sámi Sosterii 470 000 euro Ruhtaautomáhtaovttastusas
Govva: YLE
Sámiid sosiála- ja dearvvasvuođasearvi Sámi Soster lea ožžon oktiibuot 470 000 euro ruhtajuolludeami Ruhtaautomáhtaovttastusas. Doarjja lea oaivvilduvvon sihke doaibmadoarjjan ja viđa sierra prošektii.
Sámi Sostera ođđa prošeaktan jugešvuođa eastadeapmái álgá "Goaikkanas" dán ja boahtte jahkái. Dan lassin "Birgen ruovttus", "Doarjja" ja "Bálddas" -prošeavttat joatkašuvvet. Maiddái sámebearrašiid dearvvasvuohtadili ja buresbirgejumi ovddideaddji prošeakta "Boazonissonat" joatkašuvvá.
Searvi lei ohcan ruhtadeami 680 000 euro ovddas.
RAY doarjaga oažžu davvin maid Soađegili boarrásiidruoktosearvi, 85 000 euro.
RAY dahká evttohusa doarjagiid juokimis juovlamánu beallemuttu rádjai. Loahpalaš mearrádusa ruhtademiin dahká stáhtaráđđi guovvamánu álgobealde.
YLE Sápmi