Stuorra gielddat eai čoavdde Lappi gielddaid váttisvuođaid
Stuorra gielddaid vuođđudeapmi ii čoavdde Lappi gielddaid váttisvuođaid, árvvoštallá gieldadutki Lotta-Maria Sinervo Tampere universitehtas. Sinervo mielde livččii dehálaš smiehttat, mat leat gielddaid barggut, ja galgetgo buot gielddat buvttadit seamma bálvalusaid.
- Gielddaid ássiráhkadusat lea iešguđetláganat, nugo gieldalaččaid dárbbašan bálvalusatge. Stuorra gielddat eai čoavddaše váttisvuođaid ovdamearkka dihtii dearvvasvuođabálvalusaid buvttadeamis, dadjá dutki Lotta-Maria Sinervo.
Gielddaráját eai leat dat stuorámus váttisvuohta, muhto baicce eahpedássedeaddu gieldabálvalusaid buvttadeami ja daid ruhtadeami gaskkas. Sinervo mielde gielddaid ruhtaváttisvuođaid duohken lea dat, go gielddaid barggut ja ruhtadeapmi eai leat dássedeattus.