Suoma girku ja sámit deaivvadit Anáris vahkuloahpas
Bielbajávrri girku Anáris
Govva: YLE Sápmi
Lávvardaga álgá Sámit girkus -seminára Anáris. Luteralaš girku ovddasteaddjit ja sápmelaččat čoahkkanit sámekulturguovddáš Sajosii ságastallat sápmelaččaid ja girku oktavuođain.
Semináras gieđahallet earret eará sápmelaččaid ja luteralaš girku historjjá. Dát lea vuosttas geardi, go dákkár deaivvadeapmi ordnejuvvo Suomas. Mannan čavčča seammalágan seminára lágiduvvui Ruoŧas.
- Dát seminára lea oaivvilduvvon juohkehažžii, gii beare lea beroštuvvan sámeáššiin, girkoáššiin, gielas ja kultuvrras, ja dieđusge maiddái Ipmil sánis ja girkui gullamis, dadjá Oulu bismagotti sámebarggu čálli Erva Niittyvuopio.
Seminára maŋŋá, sotnabeaivve, dollojuvvo vel bismameassu, man jođiha bismá Samuel Salmi.
Seminára ordnejit Oulu bismagoddi, Anára searvegoddi, Sámediggi, Giellagas-instituhtta ja Sámi Soster -searvi.
YLE Sápmi