Vuot ođđa buolašoláhusat
Govva: Mikko Kuusisalo / YLE
Davvin leat mannan ija juksan vuot ođđa buolašoláhusaid. Salla Naruskas, mii lea beakkán galbma báiki, mihtiduvvui -37,7 gráđa buolaš.
Maiddái Lappi eanangotti máttaosiin lei hui galmmas, Roavvenjárggasge Apukka dutkanstašuvnnas miilla gávpoga davábealde mihtiduvvui -36 gráđa. Guossán guovlu goit lea ain buot galbmaseamos, doppe lei mannan ija 38,7 buolašgráđa.
Juos ovddeš dálkemearkkat dollet deaivása, buolaš čavgá vel duorastaga iđitbeaivvi. Maiddái davvin buolašta ja easka boahtte vahku álgobealde ložžegoahtá.