Aviissat ja bláđit
Suoma bealde boarráseamos sámegiel bláđđi lea Sápmelaš, mii lea almmustuvvan jagi 1934 rájes.
Guhká Sápmelačča olggosaddi lei Sámi čuvgehussearvi, mas ledje mielde sámegiela dutkit ja eará sámeberošteaddjit. Maiddái Samii Litto leamašan olggosaddin. Stáhta doarjagiin almmustuvvan Sápmelaš-áigečála bođii vel 1900-logu loahppageažis nuvttá buot sámi dáluide.
"Ođđa Sápmelaš" almmustuvai sámedikki kulturdoarjagiin moadde geardde jagis. "Ođđa Sápmelačča" guottihanovttastus ii ohcan Suoma stáhtas sierra doaibmadoarjaga.
Anáraš-bláđđi lea almmustuvvan jagi 1987 rájes. Dan olggosaddá Anárâškiela servi, man lahtut eanáš ieža čállet ságaid anárášgillii.
Sápmelaš-bláđđi ii leat almmustuvvan 2000-logu bealde, muhto Anaraš almmustuvvá jeavddalaččat njealjje geardde jagis.
Norgga bealde sámegielat aviissaid dilli lea buoret go Suomas, go stáhta doarju sámegielat aviissaide.
Jagi 2008 guovvamánu rádjai almmustuvve guokte sámegielat aviisa, Min Áigi ja Áššu. Min Áigi (ovdal Sámi Áigi) almmustuvai guovtte geardde vahkus Kárášjogas. Guovdageainnus almmustuvai guktii vahkus Áššu-aviisa, man sisdoalus ođđasiid lassin leat kulturságat ja reportášat.
Sámi álbmotbeaivve 6.2.2008 almmustuvai vuosttas nummir Ávvir -nammasaš beaivválaš aviissas. Ávvir lea boađus das go máŋggajagi ráđđádallama maŋŋel Min Áigi ja Áššu časkojuvvojedje oktii. Ávvir almmustahttojuvvui vuos golbmii vahkus, jagi 2009 rájes Ávvir lea almmustuvvan vihtta geardde vahkus.
Norgga evangelis-luteralaš friddjagirku ja Sámi mišuvdna leat juo guhká almmustahttán kristtalaš bláđi, man namma lea Nuorttanaste. Norgga beale sámi aviissain leat lohkkit maiddái Suoma ja Ruoŧa bealde.
Norggas almmustuvvá dáidda lassin Ságat-aviisa. "Ságat" čállá eanaš dárogillii sámeáššiid birra.
Ruoŧa bealde leat juo guhká almmustahttán Sámefolket-áigečála. Dan sisdoallu lea eanaš ruoŧagillii, muhto muhtimin das leat sámegielat divttat ja eará čállagat. Samefolket lea almmustahttán muhtin gaskka maiddái sierra nummiriid sámegillii.
Nubbi magasiidnaaviisa lea Sáminuorat -bláđđi, mii almmustahttojuvvo sihke ruoŧa- ja sámegillii ja bláđđi goasttaduvvo Sáminuorra organisašuvnna bokte. Bláđđi lea siktejuvvon eambbo nuoraide.