Radio

Árgabeivviid vuossárggas bearjadahkii Yle Sámi radio sádde guhtta ođasáddaga beaivvis.

Beaivválaš áigeguovdilis sáddagat dievasmahttet ođđasiid ja čilgejit áššiid duogážiid. Sámi radio muitala sámi ságaid muhto maiddái deháleamos ođđasiid Davviriikkain ja eará máilmmis.

Radio lea dieđusge diehtojuohkingaskaoapmi, muhto Sámi radio doalvu maiddái kultuvrra ovddosguvlui. Sámi radios gulat sámi musihka, máidnasiid, muitalusaid ja ságaid sápmelaččaid árgabeaivvis ja maiddái erenoamáš dáhpáhusain - ja buot sámegillii. Sámi radio fállá maiddái mánáid- ja nuoraidprográmmaid ja vuoiŋŋalaš sáddagiid.

Sámi radio ođasmahttá oasistis sámegiela. Radio bokte leat leavvan olu ođđa sánit ja dajaldagat, mat adnojit dálá servodagas ja eallimis. Dása lassin radio lea buvttadan giellagurssaid sámegiela oahpahalliide. Radio lea fuolahan oasistis unnitlogu suopmaniid bálvalusain. Yle Sámi radios leat vahkkosaš sáddagat sihke nuortalaš- ja anárašgillii.

Radio lea dehaleamos sámegielat ođasmedia Suomas. Yle Sámi Radio sádde sámegielat radioprográmmaid 2000 diimmu, NRK Sámi radio 1700 diimmu ja SR Sámi radio 700 diimmu.

Davviriikkalaš sámi radioid ovttasbargu lea nannen sápmelaččaid oktiigullevašvuođa. Radio lea muitalan ságaid Suoma, Norgga, Ruoŧa ja Ruošša sámiid áššiin oppa Davvikalohta sápmelaččaide. Davviriikkaid Sámi radioin leat oktasaš beaivválaš sáddagat ja oktasaš ođđasat máŋgii beaivvis. Daid várás sámeradiot lonohallet prográmmaid gaskaneaset.