Sámediggi
Sámedikki áirasat 2008-2011. Sámedikki ságadoalli lea Klemetti Näkkäläjärvi, I várreságadoalli Irja Seurujärvi-Kari, II várreságadoalli Erkki Lumisalmi
Sámedikki deháleamos bargu lea dahkat duohtan kultuvrralaš iešráđđema, mii sámiide eamiálbmogin lea dáhkiduvvon Suoma vuođđolágas.
Sápmelaččat válljejit juohke njealját jagi ovddasteaddjiideaset Sámediggái, mii lea Suoma sámiid alimus politihkalaš orgána.
Sámediggi lea ásahuvvon sierra lágain jagis 1996. Dađi ovdal jagiin 1973-1995 sápmelaččaid álbmotválljen orgánan doaimmai Sámi parlameanta, man Suoma ráđđehus ásahii skábmamánus 1973 sámekomitea árvalusa vuođul.
Sámediggi doaibmá Suoma vuoigatvuohtaministeriija vuollásažžan, muhto ii leat goittotge njulgestaga stáhta hálddahusa oassi. Sámediggi ovddasta sámiid virggálaš oktavuođain. Dan bargu lea ovddidit sámiid gielalaš, ekonomalaš, kultuvrralaš ja sosiálalaš vuoigatvuođaid.
Lága mielde Suoma eiseválddiin lea geatnegasvuohta gullat Sámedikki sápmelaččaid guoski áššiin ja láhkaválmmaštallamiin. Sámediggi sáhttá dahkat álgagiid ja árvalusaid, ja addit cealkámušaid eiseválddiide.
Sámedikkis leat 21 áirasa ja sidjiide njeallje várrelahtu. Sápmelaččat válljejit áirasiid juohke njealját jagi válggain, main ožžot jienastit sámi válgalogahallamii dohkkehuvvon olbmot.
Sámeválggain oppa Suopma lea oktan jienastanguovlun. Goittotge sámeguovllu njealji gielddas Anáris, Ohcejogas, Eanodagas ja Soađegilis, galget leat uhcimustá guokte áirasa Sámedikkis.
Sámedikki válggain eai leat politihkalaš bellodagat. Iešguđetge evttohasas lea sierra duogášjoavku, válgaovttastus. Juohke evttohas lea ná dego sierra válgalisttus. Eanemus jienaid čoaggán 21 evttohasa besset Sámediggái goittotge nu, ahte juohke sámegielddas lea unnimustá guokte áirasa.
Sámi kulturguovddáža huksen biđgen Sámedikki doaimmahagaid
Sámedikki hálddahusa guovddášdoaimmahat lea gaskaboddosaš lanjain Anár Rivdolis. Oahppamateriáladoaimmahat ja oassi gielladoaimmahagas leat Anár márkanis. Sámediggi lea ovttas gielddaiguin ja stáhtain plánemin Anár márkanii Sámekulturguovddáža, masa čohkkejuvvojit máŋggalágan kulturdoaimmat. Dállui bohtet maiddái čoahkkin- ja bargolanjat Sámedikki várás. Sámekulturguovddáš váldojuvvo atnui ođđajagemánus 2012.
Ohcejotnjálbmái lea ásahuvvon oassi Sámedikki gielladoaimmahagas. Doppe barget guokte giellajorgaleaddji.
Sámedikki ságajođiheaddji doaibmabáiki lea dál Eanodaga Heahtás.