[čájet govaid: Anu Avaskari rievdadivččii sámedikki hálddahusa. (Yle / Vesa Toppari ) ]
Suoma sámedikki ságadoallin leat figgamin njeallje áirasa. Okta sis lea anárlaš Anu Avaskari, guhte beasai dál goalmmát geardde sámediggái. Avaskari hálida nuppástuhttit sámedikki hálddahusa, ja doarju sápmelašmeroštallama viiddideami.
Ságadoallin Avaskari rievdadivččii sámedikki doibmavugiid.
- Sámedikki hálddahusas leat ollu váilevuođat, maid galggašii divvut. Jus olbmuid válddášedje hálddahusas buorebut ja dásseárvosaččabut vuhtii, de sii maid oassálastašedje eanet.
Duđavaš alimus hálddahusrievtti mearrádussii
Ságadoalli šluppoha galgá Avaskari mielas gieđahallat várrugasat. ILO-álgoálbmosoahpamuša ovddideames geange ovdduid ii galgga duolbmat. Dát guoská erenoamážit eatnamiid hálddašeami.
Avaskari doarju sápmelašmeroštallama viiddideami, ja lei ilus, go alimus hálddahusriekti dohkkehii mannan čavčča jienastuslohkui dakkáriid, geaid sámediggi ii lean ovdal dohkkehan.
- Illudan, go dat anáraččat, geat ledje guhká dáistalan, ožžo jienastanvuoigatvuođa. Lean goit behtton dasa, ahte olbmot ságastallet, leago mearrádus riekta vai ii. Buohkain galggašii leat vuoigatvuohta dohkkehuvvot iežaset servodagas.
Ain gielddapolitihkkar?
Anu Avaskari lea leamaš moaddelogi jagi gielddapolitihkas, ja dat vuhtto. Son lea ovdamearkka dihte dadjan, ahte sámediggi ii galggašii hehttet gielddaid eanageavahanplánaid. Sámeáššiid berošteaddji Iisko Sara lea fuolas, go ságadoallievttohas smiehttá sámepolitihka gieldda oainnus.
- Mu mielas dat lea binná beare gáržžes oaidnu. Go lea jearaldat sámepolitihkas, de dalle leat ollu viidásut go beare gielddapolitihkalaš áššit, Sara oaivvilda.
Sámedikki ságadoalli válljejuvvo guovvamánu 15. beaivve, go ođđa sámediggi čohkiida vuosttas geardde Anáris. Seamma čoahkkimis sámediggi vállje 21 áirasis alcces stivrra ja eará luohttámušolbmuid.
Ságadoallievttohas Anne Nuorgam ii hálidan searvat jearahallamii.
YLE Sápmi / Maiju Saijets