[čájet govaid: Mari Kiviniemi vuostálastá plánejuvvon gieldaođastusa. (YLE) ]
Opposišuvnnas leahkki guovddášbellodat geahččala bissehit gieldaođastusa. Duohtasuopmelaččatge leat fuolas gieldaođastusas, go sin mielde gieldalaččaid váikkuhanvejolašvuođat geahppánit. Guovddášbellodaga Mari Kiviniemi mielde stáhtaráđđi áigu goit bákkuin čađahit Supmii stuorra gielddaid.
- Ekonomalaš sivat váilot evttohusas ollásit, dan dihtii lea váttis áddet, manin stáhtaráđđi vuodjá gieldaođastusa. Dán evttohusas leat dušše sárgon ođđa gielddarájáid, ja easkka dan maŋŋá vurdet, ahte das livččii ávki, dadjá Kiviniemi.
Duohtasuopmelaččaid riikkabeaijoavkku ságadoalli Pirkko Ruohonen-Lerner ballá, ahte gieldalaččaid váikkuhanváldi gáržu.
- Jus gielddaid heaittihit olu, de lagašdemokratiija gillá ja gieldalaččain ii leat šat olus sátneváldi, čuoččuha Ruohonen-Lerner.
Maiddái sámediggi vuostálastá plánejuvvon gieldaođastusa. Ságadoalli Klemetti Näkkäläjärvi mielde ođastus duolbmá sámiid sajádaga.
YLE