[čájet govaid: Sámedikki ságadoalli Klemetti Näkkäläjärvi joatkkášii seamma politihkalaš linjá. (Yle / Vesa Toppari) ]
Sámedikki ságadoalli Klemetti Näkkäläjärvi lea almmuhan, ahte sus lea hállu joatkit ságadoallin. Näkkäläjärvi figgá ságadoallin seamma politihkain, go man mannan bajis ovddidii.
- Dat lea dat ILO-soahpamuš hui guovddážis, seammaládje go davviriikkalaš sámesoahpamuš. Anán dehálažžan dieđusge maid daid gielalaš vuoigatvuođaid buorideami ja gielaealáskahttinprográmma ovddideami.
Ságadoallin Näkkäläjärvi joatkkášii boazodoalu ja árbevirolaš ealáhusaid bealušteami, daningo su mielas sámi boazodoallu šaddá masá álot murdit gielddaid eanageavahanplánaid ovddas.
Vuostálastá hálddahusrievtti mearrádusa
Alimus hálddahusriekti dohkkehii mannan čavčča sámi jienastuslohkui dakkáriid, geaid sámediggi ii lean ovdal dohkkehan. Klemetti Näkkäläjärvi fuotnu dán mearrádusa.
- Dieđusge dat lea vearrámus muttus ovdadahku. Dathan sáhttá buktit hui ollu ođđa olbmuid, eanaš died láttiid sámi válgalogahallamii.
Guhkes áiggi politihkkár
Näkkäläjärvi lea sámepolitihkkár nuppi buolvvas, ja leamaš sámi politihkas mielde moaddelot jagi. Sámedikki ságadoallin Näkkäläjärvi leamaš dál ovtta baji. Servodatberošteaddji Iisko Sara doallá dán sutnje ovdun, go sámedikki áirasat válljejit njunnoša.
- Go son lea dál njeallje jagi leamašan ságajođiheaddjin, de olbmot gal dovdet oba bures, makkár sámepolitihkalaš áigumušat sus leat, Sara jáhkká.
Sámedikki ságadoalli válljejuvvo guovvamánu 15. beaivve, go ođđa sámediggi čohkiida vuosttas geardde Anáris. Seamma čoahkkimis sámediggi vállje 21 áirasis alcces stivrra ja eará luohttámušolbmuid.
Ságadoallievttohas Anne Nuorgam ii hálidan searvat jearahallamii.
YLE Sápmi / Maiju Saijets