[čájet govaid: Lottoarvontakone pyörmässä. (Veikkaus oy) ]
Diibmá lotto speallan davvin gánnehii, go Lappi eanangoddái deive golbma stuorra vuoittu. Ohcejogas vuite lottos vihtta miljon euro, Giemas 1,75 miljon euro ja ovtta smávva báikegottis maid seamma veardde.
Stuorámus vuoitu, gávcci miljon euro, manai goit Forssai Mátta-Supmii.
Veikkaus ii ordne dušše ruhtaspealuid, muhto juohká maid doarjagiid nuoraidbargui, dáidagii, diehtagii ja lihkadeapmái. Dán doarjaga oaččui diibmá maid nuoraid- ja luondduturismaguovddáš Vasatokka Anáris, mii oaččui ruhtadeami Rivdola valástallanhálle huksemii. Valástallanhálle áigot huksegoahtit dán giđa, ja dat lea oaivvilduvvon sihke guovllu mánáid, skuvllaid ja rávesolbmuidskuvlla atnui. Doarjaga ánssus Vasatokka bastá maid fállat bálvalusaid govttolaš hattiin. Vasatokkas fitnet earret eará leairaskuvlajoavkkut, riikkaidgaskasaš nuoraidjoavkkut ja valástallansearvvit.
Veikkaus-doarjaga ožžo mannan jagi maid Roavvenjárgga Jutajaiset ja Soađegili valástallanhálle.
Lappi eanangottis spelle diibmá viššalit lotto, gaskamearálaččat 123 euro ovddas ovtta olbmo ala. Anáris geavahedje lottoi gaskamearálaččat 151 euro ássi ala. Buot eanemus lottoi geavahedje ruđa Töysäs Mátta-Pohjanmaas, gos okta olmmoš spealai lagabui 300 euroin jagis.