[čájet govaid: Mihku Ilmár oaččui bálkkašumi vuosttas sápmelažžan. (YLE / Vesa Toppari) ]
Sosiála- ja dearvvasvuohtadorvvu guovddášlihttu lea mieđihan siviiladoaimmalašvuođa (su. kansalaistoiminnan) -bálkkašumi anárlaš Mihku Ilmárii, Ilmari Laitii. Bálkkašupmi geigejuvvui Laitii maŋŋebárgga Anáris ordnejuvvon duodjeseminára oktavuođas.
Laiti lea doaibman hui máŋggain ja iešguđetlágan servviin eaktodáhtolaš bargin ja stivralahttun, ja vástidan sierra servviin maiddái ságadoalli doaimmas. Mearkkašahtti ja guhkesáigásaš barggu son lea dahkan earenoamážit sámi duoji árvvu ja seailluheami ovddideamis, ja kulturmáhtu sirdimis nuorat sohkabuolvvaide.
Vaikko Mihku Ilmár lea vuosttas sápmelaš, guhte oažžu dán bálkkašumi, de válddii son dan vuostá vuollegašvuođain.
- Measta suorggahedje dáinna bálkkašumiin, danin go in lean vuordán dan.
- Dat gal lea duohta, ahte lean leamaš guhká mielde dáid bargguin. Muhto dat leamaš dakkár eaktodáhtolaš bargu, masa lean duođai ieš dáhtuin váldán oasi, Laiti muitala.
Siviiladoaimmalašvuođa bálkkašumi mieđihit ovttaskas olbmui, olmmošjovkui dahe searvái ánssolaš doaimmas olbmuid buresveadjima ovddidanbarggus.
YLE Sápmi / Veikko Aikio