[čájet govaid: Lappis áigot geahpedit gielddaid meari. (YLE / Antti Pylväs) ]
Lappis áiggošedje geahpedit gielddaid meari dálá 21 gielddas guđa gildii. Gieldaođastusa válbmen bargojoavku evttoha earret eará Ohcejoga, Anára ja Vuohču guovllu ovttastahttima oktan gieldan.
Suoma sámedikki ságadoalli Klemetti Näkkäläjärvi mielas dákkár evttohus heajuda sámiid dili.
- Mun in jáhke, ahte dát lea sápmelaččaid dáfus, iige sámedikki dáfus dohkkehahtti. Dat heajudivččii sápmelaččaid dili ja sajádaga. Ohcejohka livččii massit iežas sajádaga dakkár gieldan, gos leat sámit eanetlohkun, ja gieldda gielalaš bálvalusat hedjonit.
Eará sámegielddain Eanodaga plánejit laktit oktii Gihttela, Kolari ja Muoná gielddaiguin. Ruhtadoalloministeriija gieldaođastusa bargojoavku ákkastallá gielddaid oktii laktima dainna, ahte dat dorvvastivččii buorebut gielddaid doaimmaid ja bálvalusaid. Gieldaođastusa válbmemis eai goittot leat gullan sámedikki nugo láhka gáibidivččii, dadjá Klemetti Näkkäläjärvi.
- Sámedikkihan galggašii gullat áššiin, mat gusket viidát sápmelaččaid. Dán áššis eai leat gullan gal sámedikki. Mun jáhkán, ahte ođđa sámediggi ferte leat oktavuođas ruhtadoalloministeriijai, ja gáibidit ráđđádallamiid.
Gieldaođastusa válbmen bargojoavku geigii evttohusas gaskavahku gielda- ja hálddahusministtar Henna Virkkunenii.
YLE Sápmi