[čájet govaid: Ságadoallievttohas Tiina Sanila-Aikio guottiha rabas ságastallama. (YLE/Vesa Toppari) ]
Sámedikki vuosttas baji áirras Tiina Sanila-Aikio lea almmuhan, ahte hálidivččii sámedikki ságadoallin. Iežas politihkas Sanila-Aikio dáhttu lasihit ságastallama ja ovddidit eanet áššiid dievasčoahkkimii.
Ságadoallievttohas Tiina Sanila-Aikio atná goit dehálamosin seamma áššiid, go máŋggat earátge sámepolitihkkárat.
- Okta stuorámus áššiin lea dán bajis dat ILO-soahpamuš, ja doppe erenoamážit dat, mo mii dorvvastit boazodoalu boahttevuođa ja sámegiela oahpahusa olles Suomas.
Hálida lasihit rabas ságastallama
Sanila-Aikio lea šaddan dovddusin musihkkárin, guhte rocke nuortalašgillii. Sámedikki politihkkemis son ii leat leamaš mielde, muhto lea leamaš vuođđudeamen nuortalaččaid sámesearvvi. Ságadoallievttohas goit diehtá dál juo, maid buoridivččii sámedikki doaimmas.
- Mun hálidan ovddidit dakkár rabas politihka, ahte mii beassat ságastallat áššiid birra. Dat mearkkaša dan, ahte váldi galggašii leat dievasčoahkkimis.
Resurssain gitta
Sámeáššiidberošteaddji Iisko Sara mielas jurdda buktit dievasčoahkkimii eanet áššiid viiddis ságastallamii lea ortnegis. Sara goittotge váruha, ahte áššit galggašedje leat bures válmmaštallojuvvon, go dievasčoahkkin ii leat áššiid válbmenorgána.
- Dat lea das gitta, gávdnojitgo sámedikkis doarvái ollu resurssat válbmet eanet ja eanet áššiid. Dat lea mu mielas dat vuođđu, Sara lohká.
Sámedikki ságadoalli válljejuvvo guovvamánu 15. beaivve, go ođđa sámediggi čohkiida vuosttas geardde Anáris. Seamma čoahkkimis sámediggi vállje 21 áirasis alcces stivrra ja eará luohttámušolbmuid.
Ságadoallievttohas Anne Nuorgam ii hálidan searvat jearahallamii.
YLE Sápmi / Maiju Saijets