Päivännouzu-Suomen policii: Soldiers of Odin kydemäs – ”Pahat miehet ei ni tuldu”

Policien mugah pihapatruliloile ei täydynyh suurembua tugie.

Yle Uudizet karjalakse
Kuvakaappaus
Yle / Facebook

Policien mugah Päivännouzu-Suomes Soldiers of Odin -pihapatrulijoukon ruandu on kydemäs. Vie sygyzyl da keviäl patruliiruičendu Jovensuus, Savonlinnas da Mikkelisgi meni aiga ravieh, ga nygöi joukon tunnuksii takkilois nägyy ylen vähän.

– Ei ole olluh nimidä mostu, mi olis pannuh käymäh heijän ruandan ruttombah. Se mustu kuva sit, gu ”naizet da lapset, varakkua, pahat mužikat tuldih”, ei ni olluh oigei, sanou ylikomissuaru Vesa Kostamo Päivännouzu-Suomen policiilaitokselpäi.

Vuvven 2015 lopus algavunnuh pihapatruliloin ruandu oli policien mugah raviembi Jovensuus da vähimyölleh aktiivine Savonlinnas. Tavan mugah patrulilois oli läs kymmendy hengie.

– Ei se ole enämbiä moine, mittuine oli aijembah. Patruliloin ruandan vähenemizeh on varmahgi vaikutannuh se julgine pagin. Nämmä joukot ei suadu suurdu hyväksyndiä, sanou Kostamo.

Jälginedälilöil on äijän paistu Suomen Vasturinduliikkehen jyttyzis vägivaldazis järjestölöis, kudamien ruandua ei nävy Päivännouzu-Suomen policien toimialovehel. On vai yksittäzii ristikanzoi, kuduat ollah ideolougizis vijois valmehet vägivaldah da zakonattomuksih.

– En tunnista, gu mittustutahto alallistu joukkuo tiä ruadas, sanou Kostamo.

Luve sežo

Itä-Suomen poliisi: Soldiers of Odin hiipunut – "Pahat miehet eivät tulleetkaan"