Turvupaikanpakiččijat mielenozutukses Kuopios omien ololoin parandamizekse: ”Vuvven vuotimmo, ga nimittustu muutostu ei roinnuh”

Mielenozuttajat turvupaikanpakiččijat žualuittihes pakičuksien kaččelendan pitkäh aigah sego vastahottokeskuksen ololoih näh.

Yle Uudizet karjalakse
Turvapaikanhakijat osoittivat mieltään Kuopiossa poliisiaseman edessä
Sakari Partanen / Yle

Kolmanpiän läs nelliäkymmendy Siilinjärven Tarinan vastahottokeskuksen turvupaikanpakiččijua otti ozua mielenozutukseh Kuopion policiiazeman ies. Mielenozutus meni rauhas. Policii tiijusti mahtollizes mielenozutukses kahtu čuassuu enne sen zavodimistu.

Mielenozutus oli organizuittu sendäh, gu turvupaikkupakiččijoin mieles pakičuksien kaččelendu kestäy ylen hätken sego Siilinjärven Tarinan vastahottokeskuksen olot ei olla moizet hyvät.

Vastahottokeskustu pyörittäjän Setlementti Puijolan kodivuttamizen specialistan Tsega Kiflien mugah turvupaikanpakiččijat tahtottas ezimerkikse enämbän dengua. Eläjät ollah sežo pahas mieles sendäh, gu heile ei sua ičel varustua syömisty.

Kiflien mugah tädä dieluo nygöi jo kačellah Muahmuuttovirrastos, ga piätösty vie ei ole tulluh.

– Turvupaikanpakiččijat tahtottas, gu dielot muututtas kerras. Myö olemmo yhtelläh sanonuh, što Suomes se on processu, et kerras piätösty sua. Vuvven hyö ollah vuotettu, ga nimittustu muutostu ei roinnuh. Uskaldin, gu kaččelemmo dieluo huomei libo huomenenjälles da sit voimmo työdiä sen Muahmuuttovirrastoh, sanou Kiflie.

Mielenilmavukseh ozua ottanuon Faizyllah Bahramin mugah turvupaikanpakiččijat toivotah, gu policii vois avvuttua heidy nämmis probliemois.

– Nygöi elän Siilinjärvel. Sie on äijy probliemua, ezimerkikse syömizeh yhtyjiä. Tahton oigevuttu. Passibo policiele, kudai avvuttau meidy.

Yhtelläh policii ei voi avvuttua, kerran tämä on Muahmuuttovirraston dielo. Policii on työndänyh mielenozuttajien viestin Muahmuuttovirrastoh.

Luve sežo

Turvapaikanhakijat osoittivat mieltään Kuopiossa olojensa parantamiseksi: "Vuosi odotettu, eikä mitään tapahdu"