Nimittumua kielastandua: hoidokalaniekoil kai 9000 kiluo särgii kerras

Särgikaloin pyydämisty pietäh effektiivizenny nevvonnu kazvoittumizen estämizes.

Yle Uudizet karjalakse
Ammattikalastajien särkikalasaalista veneessä.
Esa Huuhko / Yle

Huondestu myö joukko ammattikalaniekkua lähtöy venehil kalastamah Suuri-Onkamon järvele. Nuottovehes on nelli hengie. Heijän tavoittehennu on suaja nedälin aigua 18 tonnua särgii. Miäry vastuau läs 12 keskisuuruzen hengimašinan painuo.

– Tämä on vezistön kunnostusruaduo. Konzu särgii kalastetah, vien luadu paranou da kaloin kandu muuttuu. Ezimerkikse mujehkandu elbyy, sendäh gu särrit syvväh mujehen mähändiä, sanelou nuottovehen piälimäine Tarmo Tolvanen.

Pädijiä särgiparvii ečitäh venehel ymbäri järvie da tutkimal luotaindu. Konzu pättävy kohtu löydyy, nuottu laskietah vedeh da terväzehgi vietäh se iäres kalua täyzi.

Verkoloih puuttuu yhtes nostokerras kolmes yheksässäh tonnua kalua.

– Tavan mugah tavoittehennu on suaja yksi libo kaksi venehellisty kalua päiväs. Tämä on kebjei, maltanet vai kalastua. Tottu sanuo, myö olemmo opastunnuh sidä 25 vuottu, nagrahtah Tolvanen.

Azetammo järvilöin kazvoittumizen

Suomen ymbäristökeskuksen arvivoloin mugah muan joga nelläs piäl 100 hehtuaran suurus järvi on kazvoittumas. Kazvoittumizen täh rannat roitah liivas, mi ei ole ihan hyvä dielo.

– Mostu probliemua on sežo pienembis al suan hehtuaran järvis, sanou kehittämispiälikkö Seppo Hellsten Suomen ymbäristökeskuksespäi.

Hellsten pidäy hoidokalastandua effektiivizenny nevvonnu kazvoittumizen estämizes. Sidä paiči se on puaksuh huogehembi da varmembi, migu esimerkikse järvilöin pohjan puhtastamine kaivamal.