Palavat batareit pakkazien aigua – Kuvven nevvon avul vähendät talvel energien käyttyö kois

Ikkunat, zanavieskat, matot da hurstit, villazet paijat, päčit, mašin da garažu vaikutetah energien kulutukseh.

Yle Uudizet karjalakse
Klapit palavat takassa.
Seppo Sarkkinen / Yle

1. Pane piäle villaine paidu, siästät kai 5 % kulutuksis

Paras lämbötila pertis on läs 21 astehtu, magavopertis vähästy vähembi. Vaivannou sinuu energien kulutus, voit kovalgi pakkazel vilumbas pertis olla, ga sit pane vai piäle villaine paidu da villazet sukat jalgah. Yhtel astehel pienendetyl lämbötilal pertis voit siästiä lämmityskulutuksis kai 5 procentua.

2. Salbua zanavieskat da pane matot lattiele

Zanavieskat maksau salvata vähimyölleh yökse. Nenga voit vähendiä viluntuluo läbi ikkunas da liigua energien kulutustu. Yhtelläh pie huoldu sit, gu zanavieskat ei oldas perti-ilman lämbötilua miäriäjän termostuatan ies eigo ni estettäs lämmöntuluo batareispäi pertih.

Ei olle ikkunoin typpielöi vaihtettu sygyzyl, se maksau luadie jälgimäi nygöi.

Latties läbi voibi tulla viluu pertih sit, konzu alapohjan eroittehet ei olla kunnos. Täs matot da hurstit voijah vähäzel avvuttua.

3. Kylyh kerras perehinneh

Pakkazel himoittau kylyh. Sähkökyly yhtelläh on koin suurembii sähkösyöjii. Kyly maksau lämmittiä yhtel kerdua kogo perehele, sendäh gu 50 procentua lämmittämizeh kulujas energies palau kylyn ezilämmitykseh da dostalit lämmön pidämizeh. Nimidä tolkuu ei ole pidiä lämmitettyy kylyy tyhjänny.

Kylyy ei maksa lämmittiä liijan räkekse. Paras kylyn lämbötila on 70–80 °C. Kylyn lämmittämine 100 °C:h suurendau sähkön kulutustu 20–30 %.

4. Lämmitä päčči jo enne kovua pakkastu

Ollou kois kaminu libo päčči, se maksau panna lämmäh jälgimäi nygöi. Hallol lämmittämine roih huogehembi, migu sähkön libo öljyn käyttämine piälämmönlähtehenny. Vie gu suannet halguo omas mečäspäi. Päččii olis hyvä ruveta lämmittämäh jo enne kovembii pakkazii da pidiä sidä lämmänny pakkazien aigua.

Toizes puolespäi alalleh da liigua lämmittiä päččii ei pie, gu ei rodies tulipaluo.

5. Anna garažas da varastos roih vilumbi

Ei olle garažas libo varastos vezibutkiloi eigo ni elekronikkua, 4–10 astehtu lämmiä jo roih. Ollou sie yhtelläh vezibutkiloi, kymmeniene astehtu lämmiä pidäs sit olla.

6. Älä lämmitä mašinua sudre

Mašinan ezilämmittämine siästäy benziniä, ga viey sähkyö. Al 10 astehen pakkazelgi roih kahten čuasun ezilämmitys, sidä pitkembi lämmittämine on energien sudre kuluttamistu.

Kirjutukses on käytetty lähtehenny energien azientundiiyrityksen Motivan koordinoittavua kuluttajien energiennevvondusivustuo eneuvonta.fi (siirryt toiseen palveluun)sego Suvi-Savon energiinevvoloi Laura Vuoris.

Luve sežo

Patterit paahtavat pakkasilla – Näillä 6 vinkillä loivennat talven energiapiikkiä kotona