Sápmi |

Ahlakorpi livččii sávvan eanet nissoniid Ohcejoga váldostivrii

Anni Ahlakorpi válljejuvvui Ohcejoga váldostivrii Gurutbellodaga ovddasteaddjin. Son livččii sávvan eanet nissoniid váldostivrii.

Jietna: Anni Ahlakorpi
Jietna

Ohcejoga váldostivrii válljejuvvujedje 6 ođđa lahtu dáid gielddaválggain. Anni Ahlakorpi árvala, ahte olbmot leat gáibidan muhtin lágán rievdadusa.

– Mun jáhkán das orui leamen dakkár áigi, ahte olbmot várra gáibidedje vehá rievdadusa, go doppe leat oalle guhká leamašan dat dihto olbmot. Ja de várra bođii vehá diekkár dovdu, ahte dál livččii áigi oaččut ođđa olbmuid dohko ja ođđa jurdagiid. Muhto lean gal maiddái hui duđavaš diesa, ahte dohko besse muhtin boares áirasat, geat leat hárjánan namalassii Ohcejoga áššiiguin bargat. Sii leat sihkkarit midjiide stuorra veahkkin doppe.

"Eat sáhte vuolgit dohko riidalit"

Ohcejoga váldostivrras leat 15 váldostivrasaji, ja lahtut ovddastit máŋgga sierra bellodaga. Ahlakorpi jáhkká, ahte sis manná bures.

– Mun gal jáhkán, ahte dat lihkostuvvá oalle bures, go mii leat nu unna joavku ja eat mii sáhte vuolgit dohko riidalit. Jos mii eat bastte doppe bargat ovttas, de eathan mii sáhte dán gieldda áššiid ovddidit mange láhkai.

Ovttasbargomokta ferte gávdnot Ahlakorpi mielas, jus váldostivraáirasat hálidit ovddidit gieldda áššiid.

– Mu mielas dat lea diekkár vuosttaš gáibádus, ahte ferte máhttit bargat ovttas ja leat gearggus dahkat maid kompromissaid, ja geahččat dan, ahte mii lea dat buoremus min gildii ja min olbmuide. Ii dan sáhte dušše fal nie geahččat, ahte mii eat bargga duoinna ja duoinna ovttasbarggu go dat lea eará bellodagas. Mun gal jáhkán dat manná bures.

Váldostivrras njeallje nissonolbmo

Ohcejoga váldostivrras 73 % leat albmát ja nissonat leat dušše 27 %. Dat dárkkuha dán dáfus dan, ahte váldostivrras leat dušše njeallje nissona. Anni Ahlakorpi lea goittotge ilus, ahte oba dange veardde nissonat besse čađa.

– Ferten gal dadjat, ahte mishan lea dál golbma geardde eambbo nissonolbmot doppe go maid lei dalle mannan válggaid maŋŋá. Dalle beasai dušše okta nissonolmmoš čađa. Muhto dat lea gal stuorra hástalus, vaikko iihan dat sohkabealli de visot mearkkaš. Muhto gal mun livččen doivon, ahte dohko livčče eambboge mannan nissonolbmot čađa. Ja dies lean eandalii hui duđavaš, ahte dat nuppi Anni, Anni Koivisto manai čađa.

Anni Ahlakorpi lei mielde Dearvva-sáddagis 10.4.2017.

Varrasamosat: Sápmi

Váldoođđasat

Bivnnuhamosat

Varrasamosat

Muualla Yle.fi:ssä